Phone: +25111111111 Email: info@mowsa.gov.et
የዜጎችን ችግር በዘላቂነት ለመቅረፍና በህይወታቸው ላይ ትርጉም ያለው ለውጥ ለማምጣት በቅንጅት መስራት ይጠበቅብናል – ክብርት ዶ/ር ኤርጎጌ ተስፋዬ
ለሁለት ቀናት ሲካሄድ የቆየው የሴቶችና ማህበራዊ ጉዳይ አመታዊ የሴክተር ጉባኤ በስኬት ተጠናቋል።
በጉባኤው የ2017 አፈፃፀም እና የቀጣይ እቅድ ቀርቦ ሰፊ ውይይት የተካሄደ ሲሆን ከጉባኤተኛው ለተነሱ ጥያቄዎችና አስተያየቶች በበላይ አመራሩ ምላሽና ማብራሪያ ተሰጥቷል።
በውይይቱ በየዘርፉ ያሉ ጠንካራና ደካማ ጎኖችን በመፈተሽ ትኩረት ሊሰጣቸው የሚገቡ አንኳር ጉዳዮችን በመለየት ጉባኤው የቀጣይ አቅጣጫ አስቀምጧል።
በጉባኤ ማጠቃለያ ላይ የሴቶችና ማህበራዊ ጉዳይ ሚኒስትር ክብርት ዶ/ር ኤርጎጌ ተስፋዬ በበጀት አመቱ በሴክተሩ ተደራሽ የሆኑትን የህብረተሰብ ክፍሎች ሁለንተናዊ ተሳትፎና ተጠቃሚነት ለማረጋገጥ የሚያስችሉ በርካታ ውጤታማ ስራዎች መሰራታቸውን ገልፀዋል።
የተገኘው ውጤት በየደረጃው የሚገኙ አስፈፃሚ አካላት ድምር ውጤት መሆኑንም በመግለፅ ምስጋና አቅርበዋል።
ሆኖም የዜጎችን ችግር በዘላቂነት ከመቅረፍና በህይወታቸው ላይ ትርጉም ያለው ለውጥ ከማምጣት አኳያ በቀጣይ ብዙ መስራት ይጠበቅብናል ሲሉም ተናግረዋል።
በቀጣዩ በጀት አመት የተያዘውን እቅድ ለማሳካት ሁሉም የድርሻውን መወጣት አለበት ያሉት ክብርት ሚኒስትሯ ሴክተሩ የተጣለበትን ሃላፊነትና ሚና በሚገባ መወጣት እንዲችል ይበልጥ ተናቦና ተቀናጅቶ መስራት እንደሚገባ በአፅኖኦት አሳስበዋል።
እንደሴክተር የአፈፃፀም ወጥነት እንዲኖር፣ በመረጃ አያያዝና ልውውጥ፣ በመዋቅርና አደረጃጀት፣ በእውቀትና ክህሎት ረገድ ያሉትን ክፍተቶች ለመፍታት ትኩረት ተሰጥቶ እንደሚሰራም ጠቁመዋል።
ፈፃሚውን ለማብቃት የአቅም ግንባታ ስራዎችን፣ የድጋፍና ክትትል ተግባራትን እንዲሁም የግብረ መልስ አሰጣጥ ስርዓትን የበለጠ የማጠናከር ስራ ይሰራል ብለዋል።
በአካቶ ትግበራ ረገድም የታየውን ጅማሮ የበለጠ በማጠናከር ተጠያቂነት ማረጋገጥ ያስፈልጋል ብለዋል። ሁነቶች ውጤት ማምጣት በሚያስችል አግባብ መከወን እንዳለባቸውም አስገንዝበዋል።
በዕለቱ የ2018 በጀት ዓመት የሴክተር እቅድ የውል ስምምነት ፊርማ መርሐግብር ተከናውኗል።
