Phone: +25111111111 Email: info@mowsa.gov.et
ኢትዮጵያ በግብርናው ዘርፍ የወጣቶችን ተጠቃሚነት ማዕከል አድርጋ እየሰራች ነው-ኤርጎጌ ተስፋዬ(ዶ/ር)
ኢትዮጵያ በግብርናው ዘርፍ የወጣቶችን ተጠቃሚነት ማዕከል አድርጋ እየሰራች እንደምትገኝ የሴቶችና ማህበራዊ ጉዳይ ሚኒስትር ኤርጎጌ ተስፋዬ(ዶ/ር) ተናገሩ።
ሁለተኛው የተባበሩት መንግሥታት የምግብ ሥርዓት ጉባኤ በአዲስ አበባ እየተካሄደ ይገኛል።
የጉባኤው አካል የሆነ የውይይት መድረክ “ወጣቶች እንደ ለውጥ ፈጣሪ፥ ጥበብና ፈጠራ ለለውጥ እና ዘላቂ የምግብ ስርዓት ያላቸው ሚና” በሚል መሪ ሀሳብ ተካሂዷል።
የሴቶችና ማህበራዊ ጉዳይ ሚኒስትር ኤርጎጌ ተስፋዬ(ዶ/ር) በውይይት መድረኩ ላይ እንደተናገሩት፥ ኢትዮጵያ በግብርናው ዘርፍ የምግብ ዋስትናን እያረጋገጠች እንዲሁም ሰፊ የስራ ዕድል እየፈጠረች ነው።
በሌማት ትሩፋት፣በአረንጓዴ አሻራ መርሃ ግብርና ሌሎች የምግብ ዋስትናን በሚያረጋግጡ የምጣኔ ሃብት ዘርፎች ወጣቶችን በንቃት በማሳተፍ ተጠቃሚ እንዲሆኑ እየተደረገ ነው ብለዋል።
በግብርናው ዘርፍ ለሚፈጠሩ የስራ ዕድሎች ምቹ ሁኔታዎችን መፍጠር፣ ለግብርና ቴክኖሎጂ እና ወጣቶች በምግብ ስርዓት ላይ ያላቸውን ሚና ማሳደግ በጉባኤው ትኩረት ያስፈልጋቸዋል ነው ያሉት።
የተባበሩት መንግሥታት ምክትል ዋና ፀሐፊ አሚና መሃመድ በበኩላቸው፥ በዓለም የሰው ሰራሽና የተፈጥሮ አደጋዎች የምግብ ስርዓት ላይ ጫና እያሳደሩ መሆኑን አንስተዋል።
ለችግሮች መፍትሄ በመስጠት የተመድ የዘላቂ ልማት ግቦችና የአፍሪካ አጀንዳ 2063 ግቦችን ለማሳካት ትብብርን ማጠናከር እንደሚገባ አፅንኦት ሰጥተዋል።
ለወጣቶች ብልጽግና እና ስራ ፈጠራ ከፖሊሲ ጀምሮ አስቻይ ሁኔታዎችን መፍጠር እንደሚያስፈልግ ጨምረዋል።
እንደ ምክትል ዋና ጸሐፊዋ ገለጻ፥ በዓለም የምግብ ስርዓት ቀጣይነት ያለው ለውጥ ለማምጣት ትብብርን ማጠናከር፣ትርክትን መቀየር፣ ለወጣቶች ስራ ፈጠራ አስቻይ ሁኔታዎችን መፍጠር ቁልፍ ጉዳዮች ናቸው።
በውይይት መድረኩ ዓለም አቀፍ የልማት ድርጅት ተወካዮች፣ፖሊሲ አውጪዎች፣ ከፍተኛ የመንግስት አመራሮች፣ወጣቶችና ሌሎች የተገኙ ሲሆን ወጣቶች ዘላቂ የምግብ ስርዓትን ለማረጋገጥ ያላቸው ቁልፍ ሚና በስፋት ምክክር ተደርጎበታል።
በኢትዮጵያ፥ በጣልያን እና በተመድ ትብብር የተዘጋጀው ሁለተኛው የምግብ ሥርዓት ጉባኤ ዋና ዓላማው የዓለም የምግብ ሥርዓትን ማሻሻል ነው ሲል ኢዜአ ዘግቧል።
